IN SUL NAVILI

Serom lì, l’altra sera, in sul Navili,

a fagh a ment al moviment de l’onda

e me vegniva incontra chi bisbili

che fa l’acqua quand la tocca la sponda.

Nissun lì intorna, men ch’on carrettee,

de quèi che fa traspòrt fin a Biegrass,

e che ògni tant el se voltava indree

per dagh on oeugg al carr che ‘ndava al pass.

In ciel gh’era ona stèlla piscinina

che in del Navili, a tratt, la se speggiava

e la soa lus in l’acqua l’era fina

e fòrsi per paura la tremava.

Da on poo lontan vegniva, cont el vent,

on quai accòrd d’ona ghitara stracca

che l’era tra la musica e ‘l lament:

trii ò quatter nòtt raa insèma con la fiacca.

E in mèzz a chi ròbb chì, ch’hinn ròbb de nient,

e l’era natural lassass andà

in chi ricòrd che in del cervèll di gent

se tègnen semper franch, abbarbicaa.

Ricòrd d’ona Milan, Milan bonaria,

cont el Navili ch’el parlava ai cà

prima ancamò che ghe robassen l’aria

quattandol cont i strad tutt asfaltaa.

Serom lì l’altra sera, che mania!

tentando de dagh vita ai ròbb ch’hinn mòrt,

e ripensand a quèll che l’è andaa via

èmm mormoraa:” I vègg gh’hann minga tòrt”.

Milan el se trasforma, l’è pù quèll,

l’è pù quèlla città ch’èmm vist fiolètt;

e anca se per numm l’è semper bèll,

tègnom in cà trii ò quatter vègg quadrètt!

 

 Edoardo Bossi 

La Mia Milano Di Una Volta | Facebook