Istamattina mì e la mia miee sèmm andaa per ‘na pratica noiosa in Comun…
combinazion, vist che giamò ne moeuvom pòcch ècco che iersera hann decis a
l’improvvista, che minga tucc el saveven e fin a tarda nòtt i telegiornal hann dii nient,
che incoeu gh’era sciopero di mèzzi… pròppi a l’ora che numm se tornava indree a
cà… on quai tramm l’andava ma gh’era tanto temp de spettà… che in gir gh’era anca
di ròsc de manifestant per i tanti ròbb succèss in ‘sti dì chì. Allora, per minga stà lì in
aeternum ne sèmm faa tutta la Via Larga a pee, e in Vittoria èmm ciappà el torpedon al
pelo… che l’è usanza che quand tì te seet a mèzz ai dò fermad, el riva el mèzzo e tì ò
te corret ò t’el lasset andà-via… Ben on poo rabbiaa gh’avevi i bigliètt in man e allora el
diavolètt in su la spalla manzina el m’ha dii:
“Oblitera nò… inscì l’imparen!”…
Seri stracch seri indecis… Son restaa lì cont i bigliètt in man. Ovèi…gh’hinn mai quèi
del contròll… con tutta la gent che la paga nò… stamattina che gh’hoo provaa mì, t’el lì:
“Buongiorno, biglietti…”
Intanta ch’el rivava… allora hoo obliteraa de prèssa… el contròll l’è passaa senza
vardamm ma la fin del gir… prima de andà giò el m’ha ciappaa e el m’ha sgridaa:
“Se fa minga inscì che mi l’hoo vista…. Per stavolta va ben… ma…” e l’è andaa-giò…
V’el giuri de rar foo di balossad… ma el mè angiolètt in su la spalla de drizza semper el
me catta subit in castegna… e el fa in manera de famm ciappa domà on spaghètt…
che gh’hoo de pensagh sora per almen on dì… A parafrasi del Gaber:
“Il controllore è stato buono.. mi ha fatto un fervorino… è finita col condono”
di Ottavio Cane
(Milano Policroma)
Milano Post è edito dalla Società Editoriale Nuova Milano Post S.r.l.s , con sede in via Giambellino, 60-20147 Milano.
C.F/P.IVA 9296810964 R.E.A. MI – 2081845