A MILAN SE NE PÒ PÙ

(di Carletto Oblò)

Oh Milan te see consciada,

se pò pù andà per strada,

sia de nòtt, sia del dì

numm incontrom rembambii.

El piazzal de la stazion

a l’è pièna de barbon:

tunisitt e nigerian

con la dròga pronta in man,

te la voeuren insubì,

ma Milan l’è quèsta chì?

Voo avanti anmò on tocchèll

e se ved on gròss cartèll

che te dis: gh’è l’area “C”,

alt! Se passa pù de lì.

Bueonos Aires, che passion!

Pien de macchin e forgon,

hann strengiuu tutta la strada

per fagh pòst, ben pitturada,

a la pista p’el ciclista,

la par fada da on artista.

Ma l’è senza protezion,

lì parcheggen i forgon.

S’èmm de dì poeu di gandolla

là in pee come di ciolla

monopattin sòtta i pee

vann in gir ‘me di badee,

tutt’i dì fann discussion:

chi va pee gh’ha mai reson!

De San Sir se gh’èmm de dì?

Gh’è chi dis:” Và demolii !”

Chi ghe l’ha col tèrz anèll:

“Tirèmm via domà quèll !”

Poeu gh’è Ròma che l’ha dii

ch’el va minga demolii.

Gh’èmm el Sindich, anca lù

cagadubbi e grattacuu

Lù l’ha faa come Pilaa

e i man el s’è lavaa:

“ Che decida la Città:

Referendom!” Ciappa là!

‘Dèss gh’è i “Boomer” e i “Zètta”

vann in gir con ‘st’etichètta,

tecnològich gh’èmm de vèss:

l’è poeu mèj tutt ‘sto progrèss?

On moment de riflession:

son convint, gh’hoo l’impression:

fòrsi mèj on quai ann fà

senza ‘sta modernità!